SPICe+ Rejections Me Galat Provisions: Company Incorporation Me Delay Se Professionals Pareshan
Company Secretaries aur CAs ne maangi SOPs me clarity aur training, taaki Ease of Doing Business aur majboot ho
Naye businesses shuru karne ke liye Company Incorporation sabse pehla kadam hota hai. Ye kaam Central Registration Centre – CRC, Ministry of Corporate Affairs ke madhyam se SPICe+ portal par hota hai.
Lekin pichle kuch mahinon me Company Secretaries, CAs aur dusre professionals ne shikayat ki hai ki CRC se kai applications me galat provisions quote karke rejections bheji ja rahi hain.
Professionals ka kehna hai ki is wajah se 1 kaam 3-4 baar karna pad raha hai. Isse samay ki barbaadi, extra cost aur sabse badi baat – entrepreneurs ka system se bharosa kam ho raha hai.
Ek senior professional ne kaha, “Humara maksad kisi ki burai karna nahi hai. CRC desh ke liye bahut zaroori department hai. Bas thodi si clarity, adhikariyon ki regular training aur ek review mechanism ho jaye to ye process aur tez aur transparent ho sakta hai.”
Experts ka maanna hai ki agar incorporation ka pehla step hi smooth ho jaye to Ease of Doing Business ko asli maza aayega aur startups ko bhi madad milegi.
Professionals ne Ministry of Corporate Affairs se anurodh kiya hai ki is mudde par dhyan diya jaye taaki naye udyamiyon ko dikkat na ho.
